វេទិកាបង្គ្រប់កិច្ច

ក្រោយការធ្លាក់ចុះសំឡេងឆ្នោតយ៉ាងគំហុក គណបក្សប្រជាជនកម្ពុជា (ស៊ីភីភី)​ ចាប់ផ្ដើមយកចិត្តទុកដាក់​នឹងការធ្វើវេទិកា​សាធារណៈ ដើម្បីស្វែងយល់ពីតម្រូវការ និងសុខទុក្ខរបស់ប្រជាពលរដ្ឋ ដែលផ្ទុយស្រឡះពី​ការដឹកនាំក្នុងអាណត្តិមុនៗកន្លងមក ដែលខ្លួនបានព្យាយាមរារាំងរាល់វេទិកាសាធារណៈ ដែលភាគច្រើននៃ​ការ​បញ្ចេញមតិ គឺរិះគន់ពីអសមត្ថភាពក្នុងការដឹកនាំរបស់ស៊ីភីភី អំពើពុករលួយ ការរំលោភដីធ្លីពីសំណាក់អ្នក​មាន​លុយ មាន​អំណាច ការគប់គិតជាមួយពួកឧកញ៉ារបស់ខ្លួនឲ្យបំផ្លាញសម្បត្តិធម្មជាតិមានរ៉ែ និងព្រៃឈើ ការលក់ដូរសម្បត្តិសាធារណៈ…។

វេទិកា ដែលបាន និងកំពុងធ្វើនាពេលបច្ចុប្បន្ន ត្រូវបានមហាជនរិះគន់ថា ជាវេទិកាបង្គ្រប់កិច្ច គ្រាន់តែដើម្បី​​បង្អួតសាធារណជន ឲ្យស្របនឹងការប្ដេជ្ញាថា “ធ្វើកំណែទម្រង់ស៊ីជម្រៅ” តែប៉ុណ្ណោះ។ រឿងនេះវាមិនខុស​ពី​សត្វខ្លា ឬឆ្កែចចកកាចសាហាវ ដែលធ្លាប់តែដេញប្រហារម្រឹកជាចំណី និងលេងសើចសប្បាយ ដល់ពេលមក​កែ​ខ្លួន គ្រងស្បង់ចីពរ​ រៀបឫករៀបពាជាអ្នកស្លូតបូត កៀងគរប្រមូលម្រឹកឲ្យមកស្ដាប់វេទិការបស់ខ្លួន តើនឹង​បាន​ប្រយោជន៍អ្វី? ព្រោះថាភាពភ័យខ្លាច វានៅដិតដាមជាប់នៅឡើយ។ មួយទៀត គេភ័យខ្លាចថា វេទិកាហ្នឹង​វាមិនខុសពីការប្រជុំទិតៀន និងស្វ័យទិតៀន ដែលធ្លាប់ធ្វើកាលពីរបបខ្មែរក្រហមនោះទេ។ ដល់តែវេទិកា​ដែល​និយាយតែវាគ្មិន ដោយគ្មានការចូលរួមមតិពីប្រជាពលរដ្ឋ វាមិនខុសពីវេទិកា ដែលស៊ីភីភី ចុះទៅធ្វើពេលខ្លួន​សម្ភោជផ្លូវថ្នល់ សាលារៀន មន្ទីរពេទ្យ ឬបង្គន់អាចម៍នាពេលកន្លងមកនោះទេ។

សរុបមកវិញ កំណែទម្រង់ស៊ីជម្រៅ តាមបែបការធ្វើវេទិកាសាធារណៈ ដែលយកខ្លា ឆ្កែចចក ជាវាគ្មិន វាគ្មាន​បានផលអីទេ ផ្ទុយទៅវិញ វាបានតែទទួលនូវការិះគន់ពីមហាជនថែមទៀតថា ជា “កំណែទម្រង់ស៊ីជម្រួយ”។ បើស៊ីភីភីមានចេតនាចង់កែទម្រង់មែន ត្រូវយកគោលការណ៍៧ចំណុចរបស់ CNRP មកអនុវត្ត ហើយលុប​បំបាត់​អំពើពុករលួយ និងបំបាត់ការប្រើអំណាចដ៏លើសលុបជិះជាន់សង្កត់សង្កិនរាស្ត្រ។ ប៉ុន្តែឲ្យធ្វើយ៉ាងម៉េច​កើត បើសូម្បីនាយករដ្ឋមន្ត្រីក៏ពាក់ព័ន្ធនឹងអំពើពុករលួយ តំណាងរាស្ត្រដ៏ល្បីល្បាញរបស់ស៊ីភីភី ក៏រត់គេចពីការ​ទទួលខុសត្រូវលើរឿងគ្រោះថ្នាក់ចរាចរណ៍បែបនេះ?

អត្ថបទសាកល្បងដោយ៖ ណុល ដារ៉ា